Hvítan - Ravenloft (Valachan)

1. & 2. session

Hvítan

1. & 2. session
Degi áður en uppskeruhátíð Hafursins átti að fara fram komu Halldura og Arletha Icespear að máli við hetjurnar og fengu þeim það verkefni að fara norður eftir Höfuðvegi til að skoða hvort von væri á vagnalestum, sem alla jafna komu á þeim tíma en lítið hafði spurst til þetta haustið. Hetjurnar fóru eftir veginum um dagleið eða að áningarstað sem kenndur er við Mánasteininn, rúnum ristan, ferstrengdan steinstöpul sem ekki er vitað hver reisti. Þar fundu hetjurnar ýmis merki um vagnalest og einnig undarleg fótspor, sem þær báru kennsl á og uppgötvuðu að voru eftir drýsla. Þá rákust hetjurnar einnig á slóð úr rjóðrinu og fóru eftir henni.
Slóðin lá að gili einu, yfir það hafði verið strengd reipisbrú og eftir að hetjurnar höfðu við illan leik komist yfir brúna, fundu þær ættflokk drýsla og áttu þar ágæt samskipti við aldinn leiðtoga þeirra, sem sagði hetjunum frá verum sem hann kallaði hvítu hamhhleypurnar og hefðu ráðist á reiðmann skammt frá Mánasteininum. Á leiðinni aftur í rjóðrið skáru hetjurnar niður brúna, til að varna því að drýslarnir kæmust þá leið yfir gilið sem og rekkar úr hópi þorpsbúa finndu flokkinn.
Þegar hetjurnar komu aftur til Unngarðs var stutt í að uppskeruhátíðin hæfist. Þegar gleðin stóð sem hæst birtist Arletha, með hvít sár í kringum munn sinn og þuldi sem í leiðslu upp vísukorn, en hneig síðan niður. Halldura uppgötvaði hvers kyns sjúkdómurinn var og sendi hetjurnar að hlíðum Silfurbergs í leit að sverðliljum. Hetjurnar fundu blómin skammt frá bæli stórrar köngulóar og þurftu að berjast við hana til að ná blómunum. Síðan sneru hetjurnar aftur til Unngarðs.
Að nokkrum dögum liðnum voru íbúar þorpsins á nálum, þeir óttuðust að fleiri kynnu að sýkjast af Hvítunni og báru ugg í brjósti fyrir komandi vetri en án vista og vara frá Rauðveldi er hættan sú að margir íbúar þyrftu að þreyja þorrann yfir köldustu vetrarmánuðina og skammta þyrfti mat. Íbúar voru auk þess hugsi yfir hvernig Arletha hefði smitast af Hvítunni og litu alla þá sem ekki féllu auðveldlega í samfélagið hornauga. Því fékk Brekán, farandssöngvari frá Helbenik, að kynnast þegar hann mætti á Hafurinn & Björninn.
Hetjurnar sýndu honum þó þá gestrisni að bjóða honum til sætis og spurðu hann frétta frá Rauðveldi, hvaðan hann var að koma. Brekán gat upplýst hetjurnar um að von Kharkov, barón, hafi komist itl Rauðveldis fyrr það sumar og heimt nýja eiginkonu úr hópi kvenna borgarinnar auk þess sem á fjórða tug handverksmanna voru fluttir nauðugir til starfa við kastala hans. Fyrir vikið var stemmingin frekar súr í borginni og Brekán ákvað að láta reyna á lukku sína í Unngarði.
Daginn eftir komu menn Doula Icespear með son ætthöfðingja drýslaættbálksins í böndum. Hetjurnar tóku að sér að gæta drýsilsins og var honum komið fyrir í ónotuðu sílói í korngeymslu bæjarins. Hetjurnar ræddu vandlega hvað best væri til bragðs að taka, því þær vildu umfram allt koma í veg fyrir að drýslarnir réðust á þorpið. Doula var þó á því að best væri að taka drýsilinn af lífi og þegar hetjurnar ræddu við hana sýndi hún þeim blóðugan kirtil sem fundist hafði í húsi Bandiis fjöldskyldunnar, en augljóslega hafði verið ráðist á sveitabýlið.
Þegar hetjurnar hittu Halldura upplýsti hann þær um að hann hafði farið að býlinu og komist að því, með því að ræða við dýr og styðjast við galdra, að einhver illmenni hefðu ráðist á býlið og flutt fjölskylduna að Haughólum, grafreit Unngarðs. Halldura hvatti hetjurnar til að komast til botns í málinu.
Hetjurnar frelsuðu drýsilinn og færðu hann út fyrir garða, þar sem hann var hvattur til að tala fyrir friði milli manna og drýsla. Síðan fóru hetjurnar að Haughólum og sáu að haugur Icespear ættarinnar hafði verið brotinn upp. Þær uppgötvuðu að þar var einhvers konar uppvakningur og réðu niðurlögum hans eftir harðan bardaga. Þá fundu hetjurnar lík meðlima Bandiis fjölskyldunnar og kölluðu eftir Doula og Halldura. Skipulögð var vakt við hauginn þá um nóttina en daginn eftir voru líkin lögð í haug og reynt að ganga vandlega frá þeim.

Comments

tmar78

I'm sorry, but we no longer support this web browser. Please upgrade your browser or install Chrome or Firefox to enjoy the full functionality of this site.